Un veciño de Chantada sentaba no banco dos acusados por deixar morrer por inanición 39 vacas da súa explotación. O caso descubriase en abril do 2016. Cando os axentes chegaron á granxa atoparon os cadáveres das reses en estado de descomposición e outros 24 exemplares máis que sobrevivían mal alimentados e con feridas por todo o corpo, que tamén acabaron falecendo. O home foi xulgado por un delito de maltrato animal.

Así o explicaba o avogado da acusación particular, Víctor Valladares: "Entendemos que estas reses morreron por desnutrición, por abandono absoluto do propietario, nunhas condiccións insalubres nas que estaba a explotación".

Para o avogado da defensa, o acusado é inocente e que os animais morreron por enfermidade. Fernando Lamelas: "Sempre lles proporcionou alimento e auga e sempre os atendeu perfectamente. Outra cousa é que por unha enfermidade os animais empezaron a morrer, nesa situación de bloqueo non soubo xestionar a retirada dos animais nin a limpeza das cortes".

Finalmente houbo acordo e o acusado aceptou seis meses de cárcere e a inhabilitación por dous anos para ter animais ao seu cargo.