Un tigre do zoolóxico do Bronx, en Nova York, é o primeiro animal infectado de coronavirus nos Estados Unidos.

O felino, de catro anos, foi contaxiado polo seu coidador. Outros seis animais, tres tigres e tres leóns, presentan síntomas compatibles coa enfermidade, e os veterinarios do zoo neoiorquino están pendentes dos resultados das análises que lles fixeron para confirmar o contaxio.

O recinto permanece pechado desde o 16 de marzo, como todas aquelas actividades non esenciais da cidade de Nova York.