CRTVG

Buscar

Un incendio obriga a desaloxar varias vivendas en Toledo

Publicado o 28/06/2019 20:11

Un incendio forestal que se declarou ás 16.50 horas na paraxe denominada "Cerro dos Paus" obrigou ao desaloxo de varias vivendas de urbanizacións próximas á cidade de Toledo. Ademais, este incendio tamén obrigou á Garda Civil a cortar a estrada CM-40 no cruzamento coa CM-400, en Toledo capital e en ambos os sentidos de circulación, segundo a información facilitada polo Infocam, e activouse o nivel 1. Doutra banda, o Sistema de Información de Incendios Forestais ( Fidias) da Consellería de Agricultura da Junta de Comunidades de Castilla-La Mancha indicou que nestes momentos, no incendio participan sete medios aéreos e sete terrestres, con 52 persoas traballando no terreo.

O presidente de Castela-A Mancha, Emiliano García- Page, escribiu unha mensaxe no seu perfil da rede social Twitter no que sinala que está "moi pendente da evolución do incendio na contorna de Montesión e La Bastida, en Toledo, que obrigou a desaloxar a veciños da zona". "Estamos en coordinación co Concello de Toledo e coa súa alcaldesa, Milagros Tolón, para traballar con todos os medios necesarios para a súa extinción", agregou na súa conta. Pola súa banda, fontes municipais informaron a Efe de que a alcaldesa de Toledo desprazouse ata o lugar do incendio para seguir in situ os traballos de extinción.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

28/06/2019