CRTVG

Buscar

Un asistente de condución fabricado en Galicia advirte os condutores dos perigos na estrada

Publicado o 05/03/2020 17:16

En dous meses chegará ao mercado un novo sistema de seguridade na condución ideado por unha empresa galega.

Entre hoxe e mañá están realizando as probas de lanzamento polas rúas do Parque Tecnolóxico de Galicia. Trátase dunha especie de copiloto que advirte o condutor dos perigos que hai na rúa co obxectivo de reducir a sinistralidade por distraccións.

"Este é un sistema avanzado de axuda á condución", explica Ángel Rodríguez, enxeñeiro da empresa que o puxo en marcha.

En canto o coche colle unha velocidade excesiva, o sistema avísanos. Tamén advirte dun perigo inminente de choque: "Temos o vehículo demasiado preto e o sistema advírtenos de que hai risco de colisión".

Os sinais de circulación tamén están incorporados no sistema. Cunha cámara, un ordenador, unha pantalla e dous anos e medio de investigación, a empresa Xesol Innovation, con sede en Vigo e Ourense, desenvolveu este sistema premiado pola Unión Europea pola súa accesibilidade.

Raúl Touza, Xesol Innovation: "Entre o prezo e que a instalación é moi sinxela, permite integralo en calquera tipo de vehículo".

Calculan que estará no mercado en menos de dous meses a un prezo de 540 euros.

Noticias web

05/03/2020