Un corte na subministración eléctrica paralizou durante unhas tres horas a actividade nas empresas do polígono industrial de San Cibrao das Viñas. O apagamento afectou boa parte do tecido empresarial ourensán. Desde as doce e media da mañá ata pasadas as tres da tarde unhas 600 empresas de San Cibrao das Viñas quedaron sen luz e tiveron que interromper a súa actividade.

Descoñécense as causas que provocaron o corte da subministración eléctrica que tamén afectou os veciños dos concellos de San Cibrao, O Pereiro de Aguiar ou Taboadela. Tamén no parque empresarial do Pereiro sufriron o apagamento.

Desde a Asociación de Empresarios do polígono de San Cibrao das Viñas din que xa lle pediron á empresa subministradora, Naturgy, un informe completo para coñecer o motivo do fallo eléctrico e que medidas van tomar para que non volva ocorrer.