O presidente dos EUA, Donald Trump, anunciou este luns mediante Twitter que suspenderá temporalmente a inmigración ao país por causa da pandemia da COVID-19, aínda que non ofreceu detalles sobre a súa decisión.

"Á luz do ataque do inimigo invisible, e pola necesidade de protexer os traballos dos nosos GRANDES cidadáns estadounidenses, asinarei unha orde executiva para suspender temporalmente a inmigración aos Estados Unidos!", afirmou Trump nun chío.

In light of the attack from the Invisible Enemy, as well as the need to protect the jobs of our GREAT American Citizens, I will be signing an Executive Order to temporarily suspend immigration into the United States!

— Donald J. Trump (@realDonaldTrump) April 21, 2020

Nin a Casa Branca nin o Departamento de Seguridade Nacional (DHS), encargado da xestión da inmigración, ofreceron detalles máis aló desa publicación do presidente, e xeraron desa maneira dúbidas sobre o efecto real que o anuncio poida ter.

Desde o inicio da pandemia, o Goberno de Trump pechou as fronteiras terrestres con Canadá e México, o tráfico aéreo internacional está na práctica suspendido e os consulados e embaixadas limitaron os seus servizos de visados.

Ademais, os EUA suspenderon leis migratorias e deportan de inmediato a México todos os solicitantes de asilo e os inmigrantes sen papeis que cruzan a súa fronteira. Daquela, o Goberno está a utilizar desde hai semanas a pandemia para endurecer a súa política migratoria.

Defensores dos dereitos dos inmigrantes manifestaron a súa preocupación por que o Goberno manteña máis aló da crise do coronavirus as medidas de emerxencia con que suspendeu leis migratorias.

O avogado Charles  Kuck, do bufete especializado en inmigración Kuck Baxter, dixo en Twitter que a Xustiza determinará que unha orde de Trump neste sentido é "completamente ilegal".

No seu chío, Trump fixo alusión á "protección" de traballos nun momento en que as medidas de confinamento contra o coronavirus destruíron 22 millóns de empregos en todo o país nun período de catro semanas, algo sen precedentes.

Con todo, a semana pasada o seu Goberno aprobou que inmigrantes con visados agrícolas poidan estender as súas estadías máis aló dos tres anos permitidos e que poidan cambiar de empregador para evitar así unha crise na cadea de subministración de alimentos.