CRTVG

Buscar

Trump confirma a morte do líder do Estado Islámico

Publicado o 27/10/2019 21:11

A operación desenvolveuse no noroeste de Siria, nunha aldea próxima á fronteira turca.

Trump explicou que Al Bagdadi tratou de fuxir con tres dos seus fillos por un túnel e que ao verse acurralado fixo estoupar o chaleco explosivo que levaba, morrendo el e os tres pequenos.

"Morreu coma un can, morreu coma un covarde. Estaba xemendo, berrando e chorando".

O presidente dos Estados Unidos indicou que no ataque, aéreo e terrestre, ademais de Al Bagdadi caeron numerosos xihadistas, pero que non houbo baixas entre os comandos estadounidenses.

Trump subliñou que os seus homes actuaron sós, pero que a operación non sería posible sen a axuda doutros países.

"Quero darlles as grazas a Rusia, Turquía, Siria e Iraq e tamén aos kurdosirios por certo apoio que puideron darnos".

Curiosamente, un dos países aos que agradecía a axuda, Rusia, puxo en dúbida a morte de Al Bagdadi.

Bagdadi, o líder do grupo xihadista máis perigoso da última década, era o terrorista máis buscado desde a morte de Osama bin Laden. Amparou a asasinato de miles de civís por motivos relixiosos, impuxo nos seus dominios un réxime teocrático con usos medievais e proclamou un califato para exportar a súa guerra por todo o mundo.

Noticias web

27/10/2019