O presidente estadounidense, Donald Trump, autorizou este xoves impoñer sancións económicas así como ampliar as restricións de visados contra funcionarios da Corte Penal Internacional dedicados a investigar a tropas estadounidenses, nun novo sinal de rexeitamento ao tribunal internacional. 

"As accións da Corte Penal Internacional son un ataque aos dereitos dos estadounidenses e ameazan con socavar coa nosa soberanía nacional", sinalou a Casa Branca nun comunicado. 

Como consecuencia, agrega a nota, "o presidente autorizou sancións económicas contra funcionarios da Corte directamente implicados nun esforzo para investigar persoal dos EUA sen o consentimento dos EUA".

Entre estas medidas figura o bloqueo de propiedades que estes funcionarios poidan ter baixo xurisdición estadounidense. 

Así mesmo, desde a Casa Branca sinalan ter "fortes razóns para crer que hai corrupción e mala conduta aos máis altos niveis da Oficina do Fiscal (cargo ocupado pola fiscala Fatou Bensouda). 

"A pesar dos repetidos chamamentos dos EUA e os seus aliados para a súa reforma, a Corte non tomou acción algunha para a súa reforma e continuou perseguindo investigacións motivadas politicamente contra nós e os nosos aliados, incluído Israel", engaden.

No seu discurso ante a ONU en 2018, o presidente Trump rexeitou a "lexitimidade e autoridade" da corte, por considerar que se extralimita nas súas decisións e vulnera a soberanía do país. 

Estados Unidos nunca foi membro da CPI, con sede na Haia (Holanda) e fundada en 1998.