Diante da xuíza de garda todos os investigados se defenderon. Recoñeceron que estaban no lugar dos feitos, pero negaron que golpeasen a Samuel con saña. Porén, a autopsia desvelaba que o mozo de 24 anos sufriu tres roturas no cranio que puideron ser provocadas cun obxecto metálico. Tras esta información, axentes da Brigada de Policía Xudicial levaron a cabo un rexistro e, presuntamente, atoparon un puño americano con navalla e dous martelos rompecristais na casa dun dos dous menores detidos. A investigación segue aberta e non se desbotan máis detencións. Xa son 26 as testemuñas que foron declarar polo crime de Samuel, 14 delas recentemente. O delegado do goberno José Miñones confirmou que a investigación continúa e que as pescudas policiais avanzan.

A Fiscalía presentou hoxe un recurso ante a Audiencia Provincial da Coruña contra o levantamento do segredo de sumario que o Xulgado de Instrución decretou sobre a investigación. A xuíza alzou esta mañá o segredo das actuacións, pero contra a decisión recorreu o ministerio público e por tanto ata que a Audiencia se pronuncie as partes non terán acceso ao contido das dilixencias practicadas. O avogado dun dos investigados sinala que non coñecer as probas que hai contra os seus clientes complica o seu labor. Luis Salgado afirma que o seu descoñecemento sobre a instrución nestes momentos e prácticamente total.

Polo momento son seis os detidos pola malleira mortal que recibiu Samuel Luiz a pasada noite do 3 de xullo.