Un paciente que estaba ingresado na UCI do Hospital Arquitecto Marcide de Ferrol foi trasladado este domingo ao Hospital Lucus Augusti de Lugo. A medida ponse en marcha conforme o protocolo de colaboración entre centros sanitarios que recolle o Plan de Continxencia. É o terceiro paciente trasladado esta fin de semana. Sanidade confirmara o sábado outros dous, ante o incremento de casos que se rexistrara na área.

O Sergas di que os traslados se fan para deixar marxe nos espazos de agudos do CHUF para o posible empeoramento dos pacientes. Están ingresados en planta 80 enfermos de covid−19. E nestes momentos hai nove persoas que precisan coidados en críticos.