Levaron un bo susto nun edificio da rúa Agustin Romero de Vilagarcía. Nunha das vivendas do terceiro andar orixinouse un incendio nesta madrugada. A súa inquilina estaba no interior. Axudárona primeiro os veciños e os servizos de emerxencia practicáronlle os primeiros auxilios ao chegaren ao inmoble.

A muller foi trasladada ao hospital do Salnés e o seu prognóstico é reservado. O lume só afectou a vivenda. A súa extinción foi rápida e non foi necesario desaloxar o inmoble. Porén o incendio provocou moito fume nas escaleiras comúns e os bombeiros confinaron os veciños no interior das súas vivendas para evitar intoxicacións.

Os técnicos constataron que había varios focos dispersos pola vivenda, polo que a Policía Xudicial xa ten aberta unha investigación e instrúe as pertinentes dilixencias.