Logo de dous días de negociacións, segue sen haber acordo entre os 27 países da UE, a Comisión e o Parlamento Europeo para renovar a Política Agraria Común.

Esta noite e a madrugada serán moi longas en Bruxelas: as negociacións para renovar a Política Agraria Común entran en tempo extra. O enfrontamento está agora mesmo nos cartos que os países ou as rexións, como Galicia, terían que co-financiar nos proxectos de desenvolvemento rural.

Bruxelas quere aumentar esa partida ao 40 % e os gobernos néganse. É o último gran tema aberto e pode reducir as axudas directas ao campo.

Máis preto están as posicións sobre os novos ecoesquemas, as primas verdes que orientarán as explotacións cara á transición ecolóxica. Hai consenso en que estes pagos directos suban do 20 ao 25 % dentro da PAC.

Os gandeiros e labregos galegos seguen sen coñecer cantos cartos recibirán por hectárea, por seren pequenas explotacións ou segundo o tipo de cultivo que traballen.