En portada desta xornada, unhas imaxes captadas polas cámaras da Televisión de Galicia.

Tino Fernández visitou hoxe os xogadores en Abegondo. Aí o ven, saíndo do recinto canda Carmelo del Pozo. Tino explicoulle ao vestiario os motivos da súa renuncia á presidencia da entidade. Evidentemente, esas razóns non transcenderon.    

Os xogadores do Deportivo xa saben as razóns da renuncia de Tino Fernández, pero consideran que non son eles os que as teñen que compartir cos afeccionados.

Eneko Bóveda, R. C. Deportivo: "As decisións que se tomaron foron explicadas aquí dentro con toda a coherencia e naturalidade do mundo, pero loxicamente non me toca a min ser o voceiro do presidente".

Cesamento do adestrador, renuncia do presidente... Os xogadores son conscientes de que poden ser os seguintes en ser sinalados.

Eneko Bóveda, R. C. Deportivo: "Nós non evitamos o vulto. Para ben ou para mal, imos ser nós os protagonistas, os culpables, os heroes ou o que sexa".

Os xogadores din que eles non enterran as opcións de ascenso do equipo e piden que, aínda que se perda en Soria, non se busquen máis razóns que as deportivas.