En España aínda non está en marcha o pasaporte covid, que vai facilitar as viaxes. Hai sete países da Unión Europea que xa o están utilizando.

O certificado dixital covid implantarase en todos os países membros a partir do 1 de xullo pero algúns estados xa se adiantaron e comezaron a despachar xa os pasaportes sanitarios. Son Bulgaria, a República Checa, Dinamarca, Alemaña, Grecia, Croacia e Polonia. E en España está previsto que comece a utilizarse en breve, o próximo luns. 

O documento é multilingüe, gratuíto e pode portarse tanto en formato físico como dixital. A información sanitaria do viaxeiro está contida nun código QR e acredita que a persoa pode desprazarse dun país a outro dentro da Unión Europea.