Os dous acusados de matar un preso do Pereiro de Aguiar durante un permiso penitenciario continuarán en prisión. A xuíza que instrúe o caso citounos hoxe, pero acolléronse ao dereito a non declarar. Están a ser investigados por asasinato e por roubo con violencia, por apropiárense, supostamente, dos cartos do falecido.

Por videoconferencia desde o cárcere do Pereiro de Aguiar, onde están ingresados desde a súa detención no pasado mes de decembro, compareceron esta mañá perante a xuíza do número 1 do Carballiño os dous acusados de matar a Fernando Iglesias Espiño durante un permiso penitenciario. Acolléronse ao dereito a non declarar e a xuíza ratificou a prisión comunicada e sen fianza que xa lles impuxera o xulgado de Ourense que iniciou a instrución, por considerar que había indicios suficientes contra eles e que existía risco de fuxida. Tamén valorou o xuíz os seus antecedentes delitivos. Ambos os dous acusados coñeceran a súa presunta vítima no cárcere do Pereiro de Aguiar, onde Iglesias Espiño cumpría condena por asasinar a súa muller e os seus dous fillos no ano 1996, en Gran Canaria.

A Garda Civil bautizou o caso como operación Avaro. As súas investigacións, que mobilizaron unha trintena de persoas, drons e xeorradares, concluíron que os dous detidos acabaron coa vida do seu compañeiro de prisión para facerse cunha herdanza de 26.000 euros. Xa gastaran unha boa parte cando os detiveron. O cadáver estaba enterrado nun monte en Piñor de Cea. Suponse que levaba alí desde agosto, cando incumpriu un permiso penitenciario e se decretou a súa busca e captura.