Seguen en estado crítico tres dos feridos do incendio dun edificio abandonado de Eivisa. Os bombeiros atoparon o cadáver dunha muller entre os cascallos do inmoble que era empregado como vivenda por unhas 80 persoas. 

Seguen sen aclararse as causas deste incendio que reduciu practicamente a cascallos os dous andares do edificio.

As primeiras investigacións indican que o inmoble abandonado era empregado como vivenda por unhas 80 persoas, aínda que se descoñece cantas podía haber nel no momento en que se orixinou o lume.

As testemuñas dixeron que se escoitaran varias explosións que se atribúen a bombonas de butano.

Cando se logrou extinguir o incendio, os bombeiros atoparon entre os cascallos do inmoble o cadáver dunha muller.

Hai outras tres persoas, de nacionalidade marroquí, que puideron ser rescatadas pero que sufriron queimaduras graves e permanecen en estado crítico. Dúas delas están ingresadas nun hospital de Eivissa e a outra foi trasladada a Valencia.

Os propios bombeiros aseguraron que era un edificio moi conflitivo porque xa tiveran que acudir a el en varias ocasións para sufocar incendios menores.