CRTVG

Buscar

Segue a busca da muller desaparecida en Valencia tras unha cita pola Rede

Publicado o 27/11/2019 14:27

Segue a busca da muller valenciana, de 25 anos, que desapareceu o pasado día 7 despois de citarse cun home pola Rede. O coche deste, que está fuxido, atopouno a Garda Civil cando ía ser despezado.

Marta Calvo desapareceu na localidade valenciana de Manuel, desde onde enviou por última vez unha mensaxe á súa nai coa súa localización.

Era o sete de novembro e desde entón non se volveu saber dela.

Ao non responder ás súas chamadas, a nai decidiu presentarse na casa que lle marcaba o localizador, pero o home que vivía nela díxolle que non coñecía de nada a súa filla.

O inquilino da vivenda marchou pouco despois e non se volveu saber del. É un home colombiano con antecedentes por narcotráfico que está a ser buscado pola policía.

O seu coche atopouno a Garda Civil nunha nave, completamente limpo e a piques de ser despezado.

Axentes especializados en homicidios e secuestros incorporáronse á busca de probas e chegaron ata esta pequena localidade de Manuel, onde viven pouco máis de 2.500 persoas.

A Garda Civil buscaba esta mañá nunha zona en que están localizados varios depósitos de auga.



 

 

Noticias web

27/11/2019