O conselleiro de Sanidade, Julio García Comesaña, suxeriu este luns que "probablemente", e "se se confirma" a boa evolución da pandemia en Verín (Ourense), o comité clínico acordará deixar sen efecto as restricións de máximo nivel neste municipio, o que suporía a reapertura da súa hostalaría e o levantamento do peche perimetral.

Así o manifestou o titular de Sanidade en declaracións aos medios durante unha visita este luns ao hospital comarcal de Valdeorras, no Barco, desde onde abriu a porta a que o comité alivie as medidas nalgúns municipios da provincia.

"Gustaríanos que fosen varios. Todos temos na cabeza un que, probablemente, se todo se confirma mañá, poida saír desas restricións", explicou, en referencia a Verín, que nas últimas dúas semanas detectou entre un e nove casos de covid-19, segundo o mapa de incidencia que diariamente fai público Sanidade.

O comité clínico mantén desde hai unha semana unha especial vixilancia nos municipios de Ribeira, Sarria, Chantada e A Rúa. Destes, só os dous últimos superan a incidencia acumulada de toda España, que rolda os 400 casos por 100.000 habitantes. En concreto, segundo consta no novo mapa de Sanidade para informar os casos de covid-19 por concello, A Rúa (Ourense) é o que ten a maior incidencia, posto que os seus 24 positivos detectados nas últimas dúas semanas implican unha incidencia de 556,3 por 100.000 habitantes.  

Ao preguntarlle sobre a situación da localidade da Rúa, o conselleiro de Sanidade limitouse a dicir que este órgano "segue pendente" cunha "monitorización a diario". Comesaña apelou á prudencia porque o comité analiza "non só o número" de contaxios, senón "as condicións" nas que se producen.

"Mañá tomaremos a decisión de seguir monitorizando ou aplicar algún tipo de restricións, o cal nos gustaría que non sucedese. É un concello de poboación pequena e calquera pequena variación provoca cambios importantes nas incidencias acumuladas", proseguiu o conselleiro. 

Ademais, no municipio lucense de Chantada, en 14 días detectáronse 38 casos de coronavirus. Con todo, se se pon esta cifra en relación ao seu tamaño, tradúcese nunha incidencia de 463,9 por 100.000 persoas. Isto significa que ambos os municipios superan as cifras para toda España, que se sitúa por baixo dos 400 casos por 100.000 habitantes en 14 días, segundo fixo público este domingo o presidente do Goberno, Pedro Sánchez.   

En canto a Ribeira (A Coruña), conta cunha incidencia menor, concretamente de 308,7 casos por 100.000; mentres que Sarria (Lugo) é mesmo máis baixa, de 285,1. Estes catro municipios mantéñense con restricións do nivel 2, a pesar de que o comité clínico de Sanidade acordou realizar un seguimento reforzado destas localidades.

Cabe lembrar que, desde este sábado, atópanse coas maiores restricións un total de 69 concellos, que manteñen a hostalaría pechada e contan con peches perimetrales. 

Sobre a situación epidemiolóxica de toda Galicia, Comesaña preferiu "pecar de prudentes" e "analizar os datos con moita cautela", porque igual que os contaxios "baixan de xeito rápido", poden "subir de xeito rápido" tamén.