O prezo da luz vai ser un dos temas de análise na reunión dos xefes de estado e de Goberno da Unión Europea que comeza esta tarde en Bruxelas. É un debate que propuxo España, xa que é un dos países máis afectados pola suba da electricidade.

O Goberno insiste en que a Unión Europea debe adoptar medidas conxuntas e urxentes para conter os prezos. O presidente do Goberno, Pedro Sánchez, trasladou este xoves ao presidente do Consello Europeo, Charles Michel, a urxencia de que a Unión Europea (UE) acorde medidas conxuntas para atallar a escalada dos prezos enerxéticos.

Sánchez reuniuse con Michel en Bruxelas horas antes do inicio do cumio de xefes de Estado e de Goberno que ten como un dos seus puntos a análise da situación xerada polo incremento dos prezos da enerxía.

España abriu o debate no seo da UE arredor deste problema, ao considerar que non é unha cuestión nacional, senón europea e, polo tanto, as respostas, á parte das que poidan dar cada Estado membro, tamén han de ser conxuntas.

Ante iso, xa houbo movementos por parte da Comisión Europea (CE), pero o Goberno español considéraos claramente insuficientes e pide ir máis aló e adoptar medidas como as compras conxuntas de gas.

Iso é o que transmitiu Sánchez no seu encontro con Michel, e iso é o que vai trasladar tamén noutra reunión posterior á presidenta da CE, Ursula von der Leyen.

Unha mensaxe que expoñerá igualmente aos líderes socialistas europeos cos que se vai reunir tamén este xoves pouco antes do inicio do cumio.

Michel recibiu na sede do Consello Europeo ao presidente do Goberno español, quen defende avanzar non só na compra conxunta de gas tras a eficacia demostrada coa adquisición unitaria de vacinas contra o coronavirus, senón tamén en revisar o sistema de fixación de prezos no mercado da electricidade. Ao seu xuízo, o sistema de prezos marxinalista penaliza as fontes de enerxía renovables.

Sánchez, na reunión que protagonizaron na localidade eslovena de Kranj a principios de mes os líderes europeos, xa lles pediu "audacia e contundencia" para adoptar medidas que freen os prezos enerxéticos.

Niso insistirá durante esta xornada en Bruxelas, xa que non está satisfeito coa resposta inicial da Comisión Europea, ao considerar que non hai que adoptar só medidas paliativas para axudar as persoas máis vulnerables, senón outras máis estruturais.

España conta neste debate co apoio de países como Francia ou Grecia. Pero, en cambio, hai outro bloque de estados, como Alemaña ou Países Baixos, que ven a suba da enerxía como un problema temporal e non ven necesarias medidas extraordinarias, máis aló do que xa permite a normativa actual.

A CE, nunha comunicación que fixo pública o pasado 13 de outubro, non expuxo medidas urxentes de forma conxunta ao considerar que os estados membros poden ofrecer respostas por si mesmos.

Aceptou reabrir o debate das compras mancomunadas, pero é partidaria de crear reservas comunitarias de gas similares ás que xa existen para a gasolina.

Sánchez tivo oportunidade de abordar tamén con Michel e Von der Leyen outros asuntos incluídos na axenda do cumio, como a evolución da pandemia de coronavirus e do proceso de vacinación e a migración.