EFE

O xefe do Goberno, Pedro Sánchez, recibiu no Palacio da Moncloa o presidente da Generalitat, Pere Aragonès, para manter unha reunión que confía que sexa o punto de partida para unha nova relación que permita atopar solucións para a convivencia.

A cita pactouse a semana pasada para a tarde deste martes e Sánchez recibiu a Aragonès na escalinata de acceso ao edificio do Consello de Ministros, onde se desenvolve o encontro. Ambos, protexidos por máscaras, saudáronse sen contacto físico algún debido á pandemia de coronavirus.

Mentres departían brevemente pousaron para os informadores gráficos flanqueados por senllas bandeiras de España e Cataluña antes de acceder ao interior do edificio para o inicio da súa reunión. Tras ela está previsto que Aragonès se traslade ata o Centro Cultural Blanquerna de Madrid para ofrecer unha conferencia de prensa xa que rexeitou comparecer na sede da Presidencia do Goberno.

Por parte do Goberno será a ministra de Facenda e portavoz, María Jesús Montero, quen dará conta ante os informadores do desenvolvemento da reunión. O Executivo central enmarca esta entrevista nas habituais de Sánchez cos diversos presidentes autonómicos unha vez que estes son elixidos. Pero nesta ocasión ten outras connotacións, xa que chega unha semana despois de que o Consello de Ministros aprobara os indultos aos líderes independentistas e espérase que se poida avanzar no calendario do diálogo entre ambos os gobernos para o que Sánchez denomina "o reencontro".

En concreto, pode darse algún paso para retomar proximamente a mesa de diálogo entre os dous gobernos. Montero, na conferencia de prensa posterior á reunión do Consello de Ministros deste martes, confiou en que a reunión sirva de punto de partida para unha nova relación en busca de solucións. Mostrouse convencida de que haberá propostas por ambas as partes e recalcou que o Goberno manterá as súas "liñas vermellas" en materia constitucional.

Pero garantiu que Sánchez tenderá a man ao entendemento e "depende da outra parte se quere sumarse a esa convivencia ou prefiren estar noutras posturas que son inútiles, non conducen a nada e xeran malestar e frustración".

Pola súa banda, Aragonès chega a Moncloa coa intención de seguir reclamando a "amnistía" de todos os afectados polo procés así como o exercicio do dereito de autodeterminación. Esta reunión celébrase horas despois de que o Tribunal de Contas reclamara un total de 5.422.879 euros a máis dunha vintena de líderes independentistas polos gastos derivados da promoción exterior do referendo do 1 de outubro de 2017 con diñeiro público.