Pedro Sánchez considera "necesario" un pacto con Italia nas negociacións da Unión Europea sobre os plans para a recuperación da crise pola pandemia da Covid-19.

"Somos dous pobos irmáns, mediterráneos e  europeístas", indica Sánchez nunha entrevista publicada este mércores por Il Corriere della Sera e tras ser preguntado pola resposta europea á pandemia. Sánchez recibe hoxe na Moncloa o primeiro ministro italiano, Giuseppe Conte, que tamén pasou por Portugal no marco dunha viaxe para reforzar alianzas para o cumio deste mes na Unión Europea para debater sobre o Fondo de Recuperación.

Tras os esforzos de países como España e Italia, Sánchez cre que "agora Europa debe estar á altura dos seus pobos" e aposta por non diminuír a dimensión do Fondo de Recuperación, pendente da aprobación dos estados membros. Segundo o presidente do Goberno español, os recursos deben chegar "rápido e durante un longo arco de tempo para facer estrutural a recuperación económica" á crise.

Este acordo, di Sánchez, "pode e debe" acadarse en xullo. Por outra parte, Sánchez sinala que España ten un "acceso adecuado ao crédito" e non ve necesario acceder ao Mecanismo Europeo de Estabilidade. Expresa o seu respecto polos denominados "países frugais", aqueles estados que se negan a aumentar o orzamento da UE, pero opina que "deben recoñecer que non hai un país que dá e outro que recibe, o fondo é unha caixa común á que todos contribuímos".