CRTVG

Buscar

Rosalía de Castro xa loce no espazo co nome dunha estrela

Publicado o 17/12/2019 12:46

A escritora Rosalía de Castro terá a partir de hoxe o seu nome nunha estrela da constelación  Ofiuco, segundo anunciou este martes a Unión Astronómica Internacional (siglas en inglés IAU).

Tras validar os resultados das votacións, o nome escollido para a estrela HD 149143 na campaña  NameExoWorlds 2019 é o da escritora cun total de 13.179 votos, máis do 39 %, entre as 20 propostas promovidas en España.

Ademais, o exoplaneta HD 149143 b, que vira arredor do mencionado astro, chamarase Río Sar, en honra ao afluente que dá nome a unha das obras en castelán máis representativas da escritora de Padrón, 'En las orillas do Sar'.

Segundo a IAU, o anuncio foi formalizado esta mañá nunha conferencia de prensa no Observatorio de París e que na Coruña se seguiu en directo desde o salón de actos da Casa das Ciencias.

O vogal da Agrupación Astronómica coruñesa Ío, Martin Pawley, impulsor da candidatura de Rosalía de Castro, valorou a decisión como unha "boísima noticia", ao indicar que se a escritora "xa tiña unha presenza universal, agora ten unha presenza estelar".

Para Pawley, "é importante que as estrelas teñan un nome cultural, porque agora cando expliquemos a constelación de Ofiuco poderemos enfocar a Rosalía de Castro co telescopio", sinalou o presidente de Ío, Xoán Cartelle.

A candidatura foi promovida por Ío en colaboración coa Fundación Rosalía de Castro e fixérona  viral nas redes sociais co hashtag #EstrelaRosalía.

A estrela Rosalía de Castro, ata o de agora coñecida como HD 149143, a que a IAU lle asignou a España nesta campaña, é unha estrela amarela anana, similar ao Sol, que pertence á constelación de Ofiuco, o encantador de serpes.

Atópase a 240 anos luz da Terra e a súa magnitude relativa é 7,89, que a converte nun obxecto visible con prismáticos en ceo escuro.

O exoplaneta Río Sar, descuberto en 2005, é de tipo xigante gasoso, un pouco maior ca Xúpiter, e, como está moi preto da estrela, tarda só catro días en completar a súa órbita.

Na competición española quedaron por detrás denominacións como os Amantes de Teruel, Isabel e Diego; Tirant e Carmesina ou outra referencia a Galicia, Breogán e Ith.

A votación a través do portal de Internet Nameexoworlds era libre e estivo aberta do 30 de outubro, cando se presentou a proposta galega, ao 12 de novembro.

A iniciativa global foi impulsada pola IAU con motivo do seu centenario, para que cada país puidese promover distintas candidaturas para poñer nome a unha estrela e ao seu planeta.

Ademais, en caso de que se descubran máis exoplanetas neste astro, a proposta de Ío inclúe outros topónimos asociados á vida e obra de Rosalía: Laíño, Lestrobe, Bastavales, Conxo ou Iria.

Máis sobre actualidade