No Coto Charly, a 996 metros de altitude, levantamos o voo sobre o canón do Sil. "Abaixo Torbeo, unha meseta, sobre o Sil, unhas térmicas amplas, bastante cómodas... e tes moito para onde ir, para Quiroga, cara o Courel, ou un voo local por aquí, suaviño. Que representa, pois evadirte, estar libre e voar, sobre todo voar".

Non é o primeiro voo que se fai desde aquí, pero si o que inaugura oficialmente esta pista de despegue que tivo que adiar máis de medio ano a presentación pública por mor da pandemia.

Antonio Ferreiro Vidal, promoveu a construcción do "Coto Charly": "Está aberta a todo o mundo que queira probar en parapente, tamén se farán biprazas, e xente que queira sobrevoar a Ribeira Sacra. Experimentar un sitio distinto".

Apoiando o evento, que fixeron coincidir coas que habían ser as festas patronais de Ribas de Sil, o campión galego de parapente Dani Rizo.

Daniel Rizo, campión da Liga Nacional de Àger de parapente "É unha zona que ten expectativas, funciona ben, ten boa térmica, para voo máis de tarde... A verdade é que, cando pasei por aquí arriba, as vistas son impresionantes. E ver o canón do Sil desde aquí é moi bonito".

A infraestrutura, que inclúe unha estación meteorolóxica que informa en tempo real sobre as condicións para o voo, aspira a converterse nun novo reclamo do xeoparque Montañas do Courel.