Hoxe retomouse en Galicia a vacinación con AstraZeneca. Nesta xornada puxéronse preto de 3.000 doses e no Sergas indican que o 70 % do persoal esencial de Galicia xa recibiu a vacina da covid−19. 

Hospitais de toda Galicia retomaron este mércores a vacinación con AstraZeneca. Recibiu hoxe a vacina o persoal dos colectivos esenciais: policias, bombeiros ou persoal educativo acudiron á cita unha vez que a Axencia Europea do Medicamento aclarase que non existe vínculo causal entre a AstraZeneca e a aparición de trombos.

De momento, o Sergas  seguirá utilizando as doses de AstraZeneca para inmunizar os grupos esenciais menores de 55 anos. Despois, pouco a pouco, comezarán a chamar tamén os traballadores esenciais de 55 a 65 anos. 

"Ilusionados, retomamos a vacinación con AstraZeneca no momento en que a deixamos e coa mesma xente que tiñamos citada aquel 15 de marzo", di Josefa Rodríguez, coordinadora da vacinación contra a covid−19 en Ourense.

Luís é un dos traballadores esenciais ao que lle anularon a cita cando se interrompeu a vacinación con AstraZeneca. Hoxe si, recibiu a primeira dose, tranquilo porque pensa, di, que temos máis probabilidades de contaxiarnos coa covid−19 que de ter algún efecto secundario grave.

Gardas civís e persoal das garderías son os colectivos que reciben hoxe no CHUO a vacina. Retómase nas sete áreas sanitarias de Galicia tras a aclaración da Axencia Europea do Medicamento de que non existe vínculo causal entre a AstraZeneca e a aparición de trombos.

Para a coordinadora da vacinación contra a covid−19 en Ourense, isto foi unha proba de que o sistema sanitario funciona. Pouco a pouco comezarán a chamar tamén os traballadores esenciais maiores de 55 anos.