Dous socorristas tiveron que ser rescatados cando facían prácticas na praia de Combouzas, en Arteixo. Os rapaces víronse sorprendidos polo mal estado do mar. De feito, no momento do suceso a boia de Punta Langosteira chegou a marcar unha altura de onda de oito metros.

O suceso ocorreu cando os dous socorristas estaban a realizar unha práctica a uns catrocentos metros da beira. Foi nesta praia de Combouzas, no concello de Arteixo, onde habitualmente hai moitas ondas, polo que os socorristas están acostumados a traballar en situacións difíciles. Pero onte, no momento do incidente, contra as dúas da tarde, había moito mar.

Iván Vicente, coordinador de Salvamento de Arteixo: "Pois na transición do comezo da práctica ao final da práctica houbo un pico de mar. Xa estaba o mar bastante grande, daba 3-4 metros de onda, pero nese instante subiu moito máis. A boia de Punta Langosteira acabou dando 8 metros. Nesa transición, os rapaces non tiveron ningún problema, pero non daban saído, a cousa estaba complicada".

Foron os propios compañeiros cunha embarcación pneumática os que conseguiron, non sen complicacións, sacalos da auga. Os dous socorristas están sans e salvos.

Iván Vicente, coordinador de Salvamento de Arteixo: "Foi difícil, foi difícil, porque falando dese nivel de mar cunha embarcación como a que temos nós, mando popero, quero dicir, non é un barco nin unha moto de auga, que ten máis rapidez, pois ten as súas complicacións, pero grazas á profesionalidade dos rapaces da embarcación puidemos sacar adiante o salvamento".

A embarcación de Salvamento Marítimo e o Helimer 401 xa estaban preparados para colaborar no rescate, pero xa non foi necesaria a súa intervención.