Portugal supera os 4.000 mortos e as hospitalizados tocan novos máximos

Portugal superou hoxe os 4.000 mortos por coronavirus despois de rexistrar nas últimas 24 horas 85 falecementos, mentres que as hospitalizacións, tanto totais como en coidados intensivos, tocaron novos máximos de toda a pandemia.

No país faleceron desde marzo 4.056 persoas con coronavirus, 85 nas últimas 24 horas, o que supón a segunda maior cifra de toda a pandemia (tras as 91 mortes do 16 de novembro). Ademais, notificáronse 3.919 contaxios desde o luns, o que eleva o balance total de casos a 268.721, dos que algo máis de 80.000 están activos. A presión sobre os hospitais segue aumentando: o número total de internados alcanzou un novo máximo de 3.275 pacientes, dos cales 506 están en coidados intensivos, tamén un récord de toda a pandemia.

O Reino Unido rexistra 608 mortos, a cifra máis alta dende mediados de maio

O Goberno do Reino Unido comunicou este martes 608 novas mortes por covid-19, a máxima cifra diaria rexistrada desde o pasado 12 maio. O número de contaxios detectados nas últimas 24 horas, con todo, descendeu ata 11.299, fronte aos 15.450 o luns e 18.662 o domingo. En total, as cifras oficiais reflicten 55.838 decesos por coronavirus desde que comezou a pandemia.

Este pico de mortes produciuse 19 días despois de que o Goberno impuxese en toda Inglaterra un confinamento que está previsto que conclúa o próximo 2 de decembro. A partir desa data, establecerase un sistema de restricións graduado, con medidas máis duras nas rexións máis castigadas polo virus.

Italia rexistra 853 mortos, a peor cifra desde marzo

talia rexistrou 853 mortos por coronavirus o último día, unha cifra que non se producía desde finais de marzo, nos peores momentos da pandemia a pasada primavera. Os falecidos aumentaron en 122 desde os 630 deste luns, cando o país xa superou a barreira dos 50.000 mortos. Segundo os datos do Ministerio de Sanidade, as últimas 24 horas rexistráronse tamén 23.232 novos contaxios, o que indica que se está aplanando a curva.