Tanto na zona norte coma na zona sur da ría de Arousa están algúns dos concellos que arestora máis preocupan ao comité clínico. Nalgúns deles, a incidencia da covid vai en aumento malia as restricións.

Concellos coma os da contorna da ría desta ria, cun peso forte da industria e do comercio e abertos ao mar, están a sufrir especialmente nesta segunda onda da pandemia.

Na Barbanza, o 87 por cento dos traballadores de empresas de Boiro, Rianxo, A Pobra e Ribeira asistían esta fin de semana a un cribado para detectar asintomáticos.

E no Salnés, O Grove, Sanxenxo e Cambados seguen no máximo nivel de restricións; pero preocupan nas últimas horas os concellos da Illa da Arousa e de Vilagarcía, onde a incidencia volveu superar os 250 casos por 100.000 habitantes.

"Se estamos facendo as cousas ben, imos con máscara, o servizo de restauración está restrinxidísimo, non entramos nen saímos... se facemos todo iso por que sobe? ¿Que é o que estamos a facer mal?", pregúntase unha veciña da vila.

É a mesma pregunta que se fan hoxe moitos cidadáns de Vilagarcía ao saber que o seu concello volve estar, outra vez, cunha incidencia da covid superior a 250. Unha noticia que chega a dez días da Noiteboa e que deixa os veciños preocupados por saber como poderán celebrar as festas.

"A explicación pode ser que houbese algún brote nalgunha empresa", apuntan. "Eu penso que a xente ten que entender que hai que estar con máscara. Hai xente que pensa que por estar coa xente que quere non se contaxia e este virus núterese precisamente da xente que un quere".

Son algunhas das explicacións que atopan os veciños para esta nova repunta nos contaxios: 94 casos máis nos últimos días, nunha vila que é tamén un paradigma da Galicia atlántica onde a mobilidade social é maior polo carácter industrail e comercial ligado á actividade marítima.

Unha variable, a da mobilidade, que xunto á densidade de poboación, está demostrando ter unha correlación coas infeccions por covid-19.