Nalgunhas adegas da Ribeira Sacra recollían aínda esta semana as últimas uvas da campaña. Iso supón que a deste ano fose a vendima máis longa da historia, xa que nalgunhas zonas comezaron a finais de agosto. Este atraso, dunhas dúas semanas, foi provocado pola inestabilidade climática do mes pasado.

Ademais, houbo que recoller máis uva ca en anos anteriores. A falta de datos definitivos, na denominación de orixe sinalan que xa se superaron os seis millóns e medio de quilos, fronte aos pouco máis de cinco millóns do ano pasado.

A variedade mencía supuxo o 80 por cento das uvas recollidas nas preto de cen adegas que conforman esta denominación de orixe, que aposta cada vez máis pola diversificación de variedades. Os adegueiros confían en mellorar este ano as cifras de comercialización, moi marcadas a pasada campaña polo impacto da pandemia.