CRTVG

Buscar

Recuperan o piso ocupado desde hai dous anos tras sete horas de negociación

Publicado o 01/10/2020 14:34

Fin dun longo pesadelo para unha familia santiaguesa. Despois de dous anos coa súa casa ocupada ilegalmente por un grupo de persoas que ademais tiñan atemorizada a veciñanza, por fin puideron recuperar a vivenda tras contactar cunha empresa especializada.

Esta mañá o movemento que había á altura do número 4 da rúa dos Lagartos no barrio compostelán de San Pedro era ben diferente ao dos últimos meses. Os propietarios da vivenda, que prefiren non saír ante a cámara por medo, accedían a ela tras vivir o drama da ocupación.

O drama, segundo explicou a propietaria, comezou tras alugar o piso a unha moza que non pagaba a renda e ao marchar deulles as chaves aos "okupas".

Despois de tentar en varias ocasións o desaloxamento por vía xudicial, recorreron hai un mes aos servizos dunha empresa especializada.

"Contactaron con nós hai un mes, comprobamos que eran os lexítimos propietarios e comezamos o proceso noso, que é pedir autorización ao Ministerio do Interior, Delegación do Goberno e seguridade privada, que neste caso non fixo falla porque atenderon a mediación", di Jaime Sanz, director de ocupacións da empresa especializada.

Sete horas e media de negociacións tras as que os dous ocupantes ilegais accederon a abandonar a vivenda a cambio da retirada das denuncias interpostas polos propietarios.

Tanto a propietaria como os veciños séntense aliviados porque o piso convertérase nun punto de consumo e venda de droga.

Tras colocar unha pechadura de seguridade e un sistema de alarma, hoxe empezaban os labores de limpeza e reparacións dos danos ocasionados.

Noticias web

01/10/2020