CRTVG

Buscar

Queiman facturas da luz para protestar pola suba do prezo da tarifa eléctrica

Publicado o 03/10/2021 16:49

Varios centos de persoas participaron nunha queima de facturas que se fixo de xeito case simultáneo nunha vintena de localidades galegas. A protesta convocouna a CIG contra a tarifa eléctrica por considerala unha "estafa" para a cidadanía.

Factura en man, preto dun cento de persoas acudiron á convocatoria da CIG na Coruña. Con esta queima pública o sindicato nacionalista protesta contra a suba imparable do prezo da luz e reclama medidas inmediatas para frear o que cualifican como "a mafia das empresas eléctricas", solucións que tamén piden os consumidores. 

"Estás toda confiada de que é sábado e podes poñer os electrodomésticos e despois non sei por que é máis caro", asegura unha das persoas que participan na concentración.

Defenden que o acceso á enerxía é un dereito universal. Para garantir uns prezos xustos, piden a intervención pública das eléctricas. "Se hoxe temos estes prezos é consecuencia de estar regulando o sistema eléctrico en favor das eléctricas, hoxe son unha mafia descarada e hai covardía por parte dos gobernos para poñer esa enerxía ao servizo do pobo. Iso non está revertendo no noso favor, somos o territorio de Estado que máis produce e o máis maltratado", afirma o secretario xeral da CIG. Paulo Carril explica que Galicia exporta o 30 por cento da enerxía que produce.

Esixen que se lle aplique á tarifa eléctrica o IVE superreducido do 4 por cento coma aos produtos de primeira necesidade.

Noticias web

03/10/2021