Un octoxenario, inspector da Policía Nacional xa retirado, foi trasladado esta mañá desde os calabozos de Lonzas ata os xulgados da Coruña onde pasou a disposición xudicial. Aquí estivo declarando durante horas. 

A Garda Civil investigábao por dous delitos de intento de homicidio, por disparar contra os dous axentes que se desprazaron á zona despois de que a súa exmuller os alertara de que os ameazara de morte. O instituto armado tamén o acusaba dun delito de violencia de xénero por estes feitos. 

Foron doce horas de tensión, o tempo que permaneceu atrincheirado na súa casa de Oleiros. Estaba armado e un axente quedou ferido.

O desenlace comezou a escribirse sobre as dez da mañá do sábado. Coa zona perimetrada, o edificio rodeado e os axentes en posición, un mediador da Garda Civil acabou por convencer o octoxenario de que a mellor alternativa para el era entregarse.

Finalmente non opuxo resistencia. Ás dez e vinte e cinco, o home saía da casa despois de case doce horas de tensión que os veciños da rúa dos Niños viviron pechados nos seus domicilios, pendentes da evolución do caso.