CRTVG

Buscar

PSA e Fiat Chrysler confirman negociacións para unha posible fusión

Publicado o 30/10/2019 10:41
PSA e Fiat Chrysler confirman negociacións para unha posible fusión

Os grupos automobilísticos PSA e Fiat Chrysler Automobiles (FCA) confirmaron que están inmersos en negociacións en relación cunha eventual alianza entre as dúas compañías, segundo informaron nun comunicado conxunto.   

"En relación cos recentes informes sobre unha posible combinación corporativa entre Grupo PSA e  FCA, confirmamos que hai negociacións en curso orientadas a crear un dos grupos de mobilidade líderes en todo o mundo", aseguraron as dúas corporacións.   

Esta confirmación prodúcese despois de que o grupo Renault anunciase uns meses atrás a súa intención de fusionarse coa compañía italoestadounidese, como parte do seu obxectivo de aumentar as sinerxias e compartir gastos de desenvolvemento en novas tecnoloxías.   

O consello de administración do Grupo PSA está previsto que manteña unha reunión este mércores co fin de discutir esta posible operación, que podería xerar un consorcio automobilístico cunha valoración duns 50.000 millóns de dólares (45.454 millóns de euros).   

Ante esta confirmación de negociacións, as accións do consorcio francés abriron a xornada deste mércores cun prezo de 26,11 euros, aínda que chegaron a subir ata 26,85 euros, o que supón un incremento do 7,7% respecto ao peche da xornada pasada.   

Pola súa banda, os títulos do grupo FCA abriron na Bolsa de Milán a 12,97 euros, o que se traduce nunha progresión do 10,3% respecto a os 11,75 euros cos que pecharon a negociación o pasado martes.   

O grupo PSA é o propietario da factoría viguesa en que Citroën iniciou a súa actividade en 1958, e é unha dos principais motores da industria en Galicia. Os efectos que esta posible fusión poidan ter nesta fábrica e no emprego aínda non se coñecen.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí