As confrarías de pescadores galegas expresaron o seu rexeitamento ao novo regulamento de control da Unión Europea. Por ese motivo, segundo informou a federación que aglutina o sector, convocaron un paro da frota artesanal para este venres, día 26, durante o cal farán soar as sirenas dos barcos, ás 12:00 horas, en sinal de protesta.

Nun comunicado, a Federación Galega de Confrarías informa que esta medida se acordou nunha reunión celebrada cos representantes do sector para tratar os principais aspectos que afectan á frota galega, como que os buques estean obrigados a rexistrar as súas capturas de forma electrónica.

Tamén alude a outras cuestións, como a xeolocalización, a obrigatoriedade de que todas as embarcacións de máis de catro metros estean xeolocalizadas, que o sector artesanal rexeita. Respecto diso, argumenta que a frota galega deste tipo "traballa na contorna das rías e en moitos casos en agrupamento".

A proposta que a Federación Galega de Confrarías expuxo ás 63 confrarías de pescadores galegas foi amarrar a frota artesanal en sinal de protesta "pola falta de consideración da Unión Europea en xeral, pero dos relatores desta iniciativa española en particular, que visitaron Galicia e non atenderon ás demandas do sector artesanal galego".

Ademais do paro da frota artesanal, acordaron dirixirse á Federación Nacional de Confrarías para informala da súa postura e solicitar apoio nos concellos galegos para que aproben mocións de apoio á frota artesanal e de desacordo co novo regulamento de control. Tamén esixen o cesamento da parlamentaria Clara Aguilera, "relatora da iniciativa española, que non tivo en conta as peticións do sector e continuou adiante co seu informe a pesar de todo", argumentan.