CRTVG

Buscar

Prohiben o baño na praia de Arealonga en Barreiros por contaminación fecal

Publicado o 24/08/2019 15:07
Prohiben o baño na praia de Arealonga en Barreiros por contaminación fecal

O resultado da análise realizada na praia de Arealonga, no municipio lugués de Barreiros, determinou a presenza de enterococos intestinais na auga en niveis que superan o valor aceptable establecido de contaminación microbiolóxica.  O Concello de Barreiros informou do sucedido este sábado nun comunicado no que explicou que a Consellería de Sanidade analizou a calidade da auga do areal o xoves pasado e determinou que non era recomendable o baño debido á presenza en exceso desta bacteria.  

Por este motivo, a administración local procedeu a colocar carteis informativos sobre a recomendación na xornada do venres e explicou que a existencia de enterococos intestinais deuse nos últimos anos como consecuencia dos "problemas de depuración das augas residuais" que existen nas parroquias de San Miguel e Reinante. A alcaldesa do municipio, Ana Ermida, sinalou que "é urxente" construír unha nova depuradora neses lugares para cumprir co "proxecto elaborado por Augas de Galicia", co que se "solucionaría o saneamento que provoca verteduras" en Arealonga. 

De momento, a Consellería de Sanidade ten previsto facer outra análise a próxima semana para avaliar a situación. Con todo, Ermida manifestou que "o obxectivo do Concello é buscar unha solución ao problema que leva existindo dende hai anos" e que necesita da "colaboración interadministrativa" para poder afrontalo.

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

24/08/2019