Premio Óscar para o Porto de Vigo en materia medioambiental. O seu proxecto de xardín mariño acaba de recibir esta distinción internacional fronte ás propostas de Estados Unidos, Canadá e Corea coas que competía. O xurado decantouse polo vigués como mellor proxecto de integración do porto no contorno costeiro.

Peiraos do solpor é a proposta do porto de Vigo para os de Bouzas e A Laxe. Un ambicioso proxecto que contempla a creación de xardíns botánicos nestas estruturas concibidas coma arrecifes artificiais. Deles colgarán cordas que posibilitarán a fixación de algas e a cría de diferentes especies. O obxectivo é recuperar e defender a biodiversidade convertendo o espazo nun observatorio da flora e fauna mariña para a cidadanía.

Esta aposta pola diminución do impacto ambiental na integracion entre a cidade e o porto valeulle ao de Vigo o premio da Asociación Internacional de Portos. Un proxecto pioneiro a nivel mundial que suporá un investimento de máis de tres millóns de euros.