CRTVG

Buscar

Pontevedra supera os 250 casos e volve ás restricións máximas

Publicado o 19/01/2021 15:14

Un ambiente triste e apagado respirábase hoxe nas rúas de Pontevedra tras coñecerse que o concello volve ao nivel máximo de restricións.

"Estamos todos tristes. As condicións cambian, anda un mirando para o chan, mirando para todo,  pero isto ímolo superar", comenta unha señora, "Isto é unha fatalidade, a verdade eu non sei a quen botarlle a culpa", laméntase un veciño.

Había ata quen amosaba certo enfado. "É que non estamos preparados, ninguén sabe como é isto nin nada, isto de coller e pechar todo tampouco non é", afirma un veciño.

Onde máis se vai notar é na hostalería. Dani é un dos empresarios que peregrinou a Madrid na procura de axuda para o sector.

"Estamos en Galicia, é o mes de xaneiro, ou sexa traballar so coa terraza é inviable", fala Daniel Lorenzo, vogal de HOEMPO.

Algúns son máis optimistas. Luis tivo que darlle un novo rumbo ao seu local.

"Este é un local especializado en coctelería pero a verdade é que nos adaptamos un pouco aos horarios e as novas medidas e agora temos café, facemos almorzos e servimos a domicilio tamén. Sobrevive o que mellor se adapta, non o máis forte", comenta Luis López que é hostaleiro.

A covid dispárase na área sanitaria de Pontevedra-O Salnés, onde xa superaron o milleiro de casos activos.

"Eu non estou en Montecelo, pero creo que si o efecto Nadal estase notando, a xente non cumpriu as recomedacións, e así estamos", apunta unha sanitaria.

13 persoas con covid están ingresadas na UCI nesta área sanitaria.

Noticias web

19/01/2021