CRTVG

Buscar

Política Social abre este martes o prazo para solicitar o Bono Coidado

Publicado o 10/08/2021 10:19
Política Social abre este martes o prazo para solicitar o Bono Coidado
EP

A Xunta abre este martes o prazo para o Bono Coidado, unha axuda económica destinada á atención das necesidades puntuais de conciliación das familias galegas. Os interesados poderán presentar a súa solicitude ata o 30 de setembro. O Diario Oficial de Galicia publica este luns a orde da convocatoria que este ano inclúe como novidade a axuda para financiar servizos de conciliación en períodos vacacionais, como campamentos.

O Bono Coidado permitirá solicitar a contratación dun servizo de conciliación en caso de enfermidade do neno ou do coidador habitual, para cuestións de carácter laboral ou para outro tipo de situacións. Coas novidades da convocatoria, ofrecerase unha axuda durante o verán para a contratación dunha persona ou para acudir a centros autorizados (ludotecas, espazos infantís ou servizos semellantes), sempre que ambos os proxenitores acrediten que, por motivos laborais, non poden facerse cargo da atención do neno de ata 12 anos.

A Xunta destina uns 1,8 millóns de euros a esta iniciativa, ampliables en función das solicitudes presentadas e que tamén atenderán as necesidades de conciliación inscritas desde o 1 de xaneiro deste mesmo ano.

 

Noticias web

10/08/2021