EP

Unidas Podemos anunciou que interpoñerá unha querela contra a presidenta do Congreso, Meritxell  Batet, por un presunto delito de prevaricación tras a decisión "unilateral" de comunicar a retirada do escano ao ata o de agora deputado da formación Alberto Rodríguez.   

Segundo explicaron fontes do grupo confederal, a determinación de Batet de subtraer a condición de deputado a Rodríguez baixo o argumento de executar a sentenza de inhabilitación do Tribunal Supremo adóptase contra o criterio dos letrados da cámara e da Mesa do Congreso, que se expresaron favorables a que conservase a súa acta.   

"A presidenta do Congreso coñece a sentenza e sabe que a inhabilitación de Alberto Rodríguez era para ser elixido nunhas próximas eleccións durante 45 días, o que en ningún caso implica perder o escano", argumentan en Unidas Podemos.   

Por tanto, censuraron que a súa decisión, que toma "cedendo ante a vergoñosa presión do Supremo e á extrema dereita", fai un "dano enorme" á democracia e ao país.   

Batet púxose en contacto persoalmente con Rodríguez para trasladarlle o oficio do presidente do Tribunal Supremo, Carlos Lesmes, polo que se dá traslado da sentenza da Sala Segunda, que comporta a perda da súa condición de deputado, e do auto polo que se dispón a súa execución.

O CXPX rexeita as declaracións de Ione Belarra

Pola súa parte, O Consello Xeral do Poder Xudicial publicou un comunicado rexeitando as declaracións da ministra Ione Belarra, que nas redes sociais acusou ao Supremo de presionar á presidenta do Congreso para quitarlle o escano a Rodríguez.

Alberto Rodriguez fue condenado a pesar de las pruebas que demuestran que él no estuvo allí. El objetivo era quitarle el escaño.

El Supremo presiona a la Presidencia del Congreso para retirárselo aunque ambos saben que no es lo que dice la sentencia.

Prevaricación.

— Ione Belarra (@ionebelarra) October 22, 2021