A secretaria xeral de Podemos e ministra de Dereitos Sociais, Ione Belarra, solicitou unha reunión urxente da mesa de seguimento do acordo de coalición entre o PSOE e Unidas Podemos. "Necesitamos abordar a xestión e execución dos compromisos de coalición", manifestou nun chío en Twitter sen facer mención concreta aos puntos concretos do pacto. 

El espacio confederal de Unidas Podemos solicita una reunión urgente de la mesa de seguimiento del acuerdo de coalición entre el PSOE y UP.

Necesitamos abordar la gestión y ejecución de los compromisos de coalición.

— Ione Belarra (@ionebelarra) October 22, 2021

Hai dúas semanas, Pedro Sánchez e Yolanda Díaz esceneficaban ante a prensa a unidade dentro do Goberno, que se concretaba en dous acordos: o proxecto de presupostos e a futura lei de vivenda. Pero ese chío publicado a primeiras horas deste venres por Ione Belarra rompía esa boa sintonía. A causa, din os morados, é a "inxerencia" da vicepresidenta económica nas negociacións para a reforma laboral, que pilota a ministra de Traballo.

Onte mesmo, Nadia Calviño asistía ao congreso de Comisións Obreiras e afirmaba que as conversas cos axentes sociais aínda estaban verdes. "Houbo encontros e contactos preliminares pero de momento non se iniciou a fase de negociación", aseguraba a número dous do Goberno. 

Minutos despois, corrixíaa alí mesmo o líder de CCOO, Unai Sordo, recordando que "a reforma laboral leva negociándose bastantes semanas e bastantes meses", en liña co anunciado por Yolanda Díaz nos últimos días. Este mesmo luns, a vicepresidenta segunda afirmaba que "están moi avanzadas e rapidamente teremos unha proposta de reforma laboral". No Ministerio de Traballo cren que Nadia Calviño está manobrando para coordinar ela esas negociacións.

Dende a patronal xa reaccionaron. "Hoxe unha noticia, mañá outra, filtro unha, filtro outra,... sinceramente, se estás sentado na mesa é moi complicado traballar así" declaraba aos xornalistas Antonio Garamendi. Para o presidente da CEOE, "aquí non so estamos falando de emprego, estamos falando de economía, educación, de moitas cousas"

A crise interna colleu a Pedro Sánchez en Bruxelas, aínda así o PSOE asegura que a coalición goza de boa saúde.

Este anuncio prodúcese ademais horas despois de que o PSOE e o PP chegaran a un acordo para renovar os órganos constitucionais, agás o Consello Xeral do Poder Xudicial.

Por outro lado, o pasado mércores Unidas Podemos reclamou á parte socialista do Goberno que a prórroga do 'escudo social', que se tratará no próximo Consello de Ministros e que a vixencia actual expira o 31 de outubro, sexa "completa e ata que sexa necesario". O espazo confederal, tras o acordo sobre o proxecto de orzamentos xerais do Estado para 2022, solicitou a derrogación da reforma laboral e a Lei de seguridade cidadá, coñecida como 'Lei mordaza'.