CRTVG

Buscar

Pedro Sánchez pídelle á oposición que "abandone o bloqueo e permita un goberno progresista"

Publicado o 11/09/2019 18:10

O presidente do Goberno en funcións, Pedro Sánchez, pediulles este mércores aos principais partidos da oposición que "abandonen o bloqueo" e "permitan que se constitúa un goberno progresista".

Na súa comparecencia no Congreso para informar dos últimos consellos europeos, Sánchez puxo de exemplo o consenso alcanzado para a repartición institucional da UE para facer esta reclamación ás forzas políticas na cámara baixa.

Un día despois de que volveran encallar as negociacións entre o seu partido, o PSOE, e Unidas Podemos, Sánchez non se referiu a este asunto, pero elevou a súa petición aos partidos para que lle permitan conformar goberno.

Así, sinalou que España ten que facer fronte a "grandes transformacións" e por iso é "imprescindible que se inicie a lexislatura". O líder dos socialistas reclamou aos principais partidos da oposición -sen citar explicitamente a ningún- que "abandonen o bloqueo" e permitan un "goberno progresista" porque iso, recalcou, é o que pediron os votantes á vista dos resultados das eleccións do 28 de abril. 

Sánchez subliñou que non se pode volver negociar o acordo de saída do Reino Unido da Unión Europea e "non cabe facer máis concesións", á vez que puxo en valor a unidade de acción da UE para facer fronte a este proceso.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí