EUROPA PRESS

O presidente do Goberno mostrouse partidario de abrir un debate a nivel europeo sobre o marco normativo dos mercados eléctricos tendo en conta que, sostivo, o prezo da enerxía é un "problema europeo".   

Desde Atenas, onde participou no cumio EUMED-9 xunto aos seus homólogos doutros oito países mediterráneos da UE, Sánchez explicou que un dos temas que discutiron foi precisamente o do prezo da enerxía. Debido a que non é un problema de cada país, senón "europeo", dixo, "temos que atopar solucións a nivel europeo".

Segundo Sánchez, desta forma a UE poderá facer valer máis o seu "peso específico nas relacións internacionais para a autonomía estratéxica" e ser capaz de "dar respostas máis eficaces a ese prezo da enerxía". Ata o de agora, incidiu o presidente do Goberno, os Estados membros o que fixeron foi responder "cos nosos instrumentos nacionais".

"Se queremos facer desa transición ecolóxica unha transición xusta temos que empezar a abrir un debate europeo sobre o marco normativo que temos dos mercados da electricidade", sostivo. Tamén hai que "empezar a pensar nunha autonomía estratéxica da enerxía e, por que non, do gas natural", subliñou, insistindo en que se trata dun debate que se expuxo xa á Comisión Europea e ao resto de socios e que "vai ser necesario abrir no conxunto da UE".   

Sánchez realiza estas declaracións despois de que o Goberno aprobase o martes pasado un plan de choque para frear a escalada dos prezos da luz, que incluía medidas fiscais, regulatorias e de protección dos clientes máis vulnerables.   

Entre as medidas aprobadas figura unha que implica un recorte de 2.600 millóns nos ingresos ás compañías eléctricas, que desencadeou o esborralle en Bolsa de Endesa e Iberdrola e suscitou as queixas do sector e dos investidores internacionais pola inseguridade xurídica que pode representar.   

Esta mesma semana, o Alto Representante para a Política Exterior da Unión Europea e vicepresidente da Comisión, Josep Borrell, avogou por reformar o sistema europeo de fixación de prezos da electricidade debido ás súas "demasiadas disfuncións".   

"Tarde ou cedo, Europa terá que dicir algo. O sistema ten que ser revisado porque ten demasiadas disfuncións. A translación do custo do gas a outras enerxías cuxo custo de produción non ten nada que ver co prezo de gas é algo que non ten unha xustificación económica clara", dixo.   

Borrell mostrouse convencido de que finalmente este debate se abrirá no seo da Comisión Europea, dado que a subida dos prezos da electricidade acabará por afectar a todos os países, non só a España.