Cinco dos dez detidos nun operativo contra o tráfico de drogas na cidade de Ourense ingresaron en prisión tras prestar declaración no xulgado ao longo deste mércores.

Os detidos nesta operación, sete homes e tres mulleres, están acusados de delitos de tráfico de drogas e pertenza a grupo criminal, tras localizar as forzas de seguridade un importante volume de substancias estupefacientes en varios rexistros.

Segundo informou a comisaría provincial, estas dez persoas foron arrestadas polo grupo de estupefacientes no marco da denominada Operación Virgo, que arrincou durante o estado de alarma.

Nos rexistros efectuados en domicilios e garaxes, os axentes incautáronse de máis de oito quilos e medio de haxix, cocaína e marihuana; 190 pastillas de MDMA (éxtases), metanfetamina e 47.000 euros, ademais dun vehículo, material informático, teléfonos móbiles, dúas armas longas, unha de aire comprimido e unha pistola eléctrica.

A investigación arrincou despois de ter coñecemento os axentes do movemento de persoas que se desprazaban ata o barrio de Barrocás para adquirir substancias estupefacientes para o seu consumo. Alí acharon "indicios suficientes" da existencia de varios puntos de venda de drogas na cidade por parte dos agora detidos, segundo a mesma fonte.

A investigación foi desenvolvida por funcionarios do grupo de estupefacientes da Policía Xudicial de Ourense en colaboración dun subgrupo de GOES (Grupos Operativos Especiais de Seguridade) de Bilbao, A Coruña, guías caninos e grupo de estupefacientes da Garda Civil de Ourense.