A Audiencia Provincial de Burgos condenou a 38 anos de cárcere a cada un dos tres ex-xogadores do Arandina Club de Fútbol acusados de agresión sexual cometida contra unha menor, de 15 anos, en novembro de 2017 na vivenda que compartían os procesados.

A Audiencia notificou este xoves a resolución xudicial aos tres acusados, que compareceron no edificio xudicial pouco antes das 11.00 horas. Segundo a sentenza, terán que cumprir un máximo de vinte anos en prisión. 

Na resolución xudicial aplícase o principio que xa se utilizou no caso da Manada de Pamplona de "intimidación ambiental", baseada en que os tres condenados estaban a soas coa vítima coa luz apagada e actuaron por sorpresa sen que a menor puidese reaccionar debido á diferenza de idade e complexión física -os acusados teñen 19, 22 e 24 anos-. No caso do menor deles, Raúl Calvo, a Audiencia absólveo da acusación de agresión sexual continuada debido a que a súa madurez é similar á da vítima. 

Tamén se absolve os tres procesados, Carlos Cuadrado 'Lucho' e Víctor Rodríguez 'Viti', ademais de Calvo, dun delito de proposición de actividades sexuais. Os tres acusados deberán indemnizar a vítima conxunta e solidariamente con 50.000 euros e terán prohibido comunicarse con ela durante dez anos. Na sentenza tense en conta o testemuño da demandante porque "resultou corroborada polas persoas máis próximas, e o informe psicolóxico".

Réstase importancia a que ofrecese unha versión diferente a persoas coas que tiña menor confianza, o que se atribúe á influencia das redes sociais na forma de atenuar o sucedido ao contalo, polo que se considera crible a versión que figuraba na denuncia. Ademais, a sentenza considera que os tres condenados sabían que a denunciante era menor de 16 anos porque ía ao colexio con uniforme e a nai da rapaza e algunha testemuña fixéranllelo saber.