O Tribunal Supremo decide este mércores sobre o ERE presentado pola dirección, que supoñería o peche da fundición e 524 despedimentos. A venda da planta de aluminio non se levou a cabo e os maxistrados decidirán cal é o seguinte paso. A resolución podería coñecerse o mesmo día en que se reúnen os xuíces do Alto Tribunal, o máis probable é que pasen uns días antes de coñecerse a sentenza. Os maxistrados do Supremo deben decidir se aprecian "mala fe" nun ERE sobre o que "non houbo negociación efectiva durante o período de consultas, tal e como obriga a lei", resaltan fontes sindicais.

O TSXG declarou en decembro do ano pasado nulo o expediente de regulación de emprego, posto que "o fin único e primordial que guiaba a empresa era apagar as cubas e pechar a fábrica da forma máis rendible posible", argumentou. Os sindicatos alertan sobre a posibilidade de que Alcoa tente de novo pechar a fundición e sobre "o desgaste" dos obreiros tras anos de loita.