Os socios de Goberno reúnense esta tarde despois dunha fin de semana de contactos para intentar rebaixar a tensión, segundo confirman no Executivo. A crise saltaba pola negociación sobre a reforma laboral. Liderada ata agora pola ministra de Traballo Yolanda Díaz, a vicepresidenta económica Nadia Calviño tamén reclamou participar nas negociacións, co apoio de Pedro Sánchez.

En Unidas Podemos si falan de inxerencias por parte de Calviño. Queren que Traballo sexa o único ministerio sentado cos axentes sociais e insisten na cuestión de fondo. 

Esta mañá confirmáronse as persoas que asistirán a esa reunión por parte de Unidas Podemos. Serán a secretaria xeral de Podemos e ministra de Dereitos Sociais, Ione Belarra, a ministra de Igualdade, Irene Montero, e o voceiro no Congreso de Unidas Podemos, Pablo Echenique.

Non estará presente a vicepresidenta Yolanda Díaz, pero si haberá persoal do seu departamento. O seu xefe de gabinete, Josep Venderell, e o secretario de Estado de Emprego e Economía Social, Joaquín Pérez, serán os encargados de presentar a postura do Ministerio de Traballo.

Os socialistas réstanlles importancia ás discrepancias, reclaman a implicación de máis ministerios nas negociacións, e aseguran que "o Goberno está cohesionado detrás do presidente", en palabras do ministro de Asuntos Exteriores, José Manuel Albares.

Díaz admite un momento "complicado" no Goberno

A vicepresidenta segunda e ministra de Traballo, Yolanda Díaz, admitiu que o Goberno de coalición está nun momento "complicado" por mor desas discrepancias xurdidas arredor da reforma laboral.

En todo caso, en declaracións tras un acto en Santiago de Compostela, insistiu en que as diferenzas entre os socios de Goberno a este respecto "non van de quen lidera" a negociación e si "de que imos facer na principal reforma de mercado de traballo do noso país".

"Nunca discuto os postos, tanto é así que nesa pelexa que houbo entre ser vicepresidenta segunda ou terceira, eu tardei cinco minutos en renunciar a isto", esgrimiu Díaz.

O que en principio queda fóra da xuntanza é a outra polémica entre os socios pola retirada do escano ao deputado de Unidas Podemos Alberto Rodríguez, que finalmente non presentará a querela contra a presidenta do Congreso como anunciara nun principio, acusándoa de atentar contra a democracia. Os socialistas pecharon filas con Batet.

Rodríguez desiste da querela penal, pero si pedirá amparo ao Constitucional contra a sentenza e contra a decisión de Batet.

Podemos cre que a decisión de Meritxell Batet de retirarlle o escano ao seu deputado Alberto Rodríguez non é legal. A voceira dos morados, Isa Serra, cualificou a decisión de "ataque á democracia" e reclamou a dimisión da presidenta do Congreso.

Visión contraria teñen no PSOE. Para Felipe Sicilia,  Batet "cumpriu escrupulosamente coa lei" e "fixo o seu papel de maneira magnífica". Finalmente, Alberto Rodríguez, que xa abandonou Podemos, non vai presentar unha querela contra Batet, pero si recorrerá ante o Constitucional para tentar recuperar o escano.