O presidente do Eurogrupo, Mário Centeno, defendeu este venres que a resposta económica á pandemia debe pasar por centrarse nunha recuperación que garanta a igualdade de condicións entre os Estados europeos, xa que non todos teñen a mesma marxe para afrontar esta crise

O Eurogrupo abordará as previsións macroeconómicas publicadas esta semana pola Comisión, que apuntan a unha recesión do 7,7 % na área da moeda única este ano e un rebote do 6,3 % en 2021, pero advirten de que a recuperación será moi desigual entre Estados, con España, Italia ou Francia entre os máis afectados.

A súa principal tarefa, con todo, será deixar acordados todos os detalles da liña de crédito para a pandemia que establecerá o Mecanismo Europeo de Estabilidade (MEDE), o fondo de rescate da eurozona, que poderá prestar ata o 2 % do seu PIB as países que o soliciten para cubrir gasto sanitario directo ou indirecto.

O Ministerio de Economía español espera que o Eurogrupo peche hoxe un acordo de modo que a xunta de gobernadores do MEDE poida dar o seu visto e prace a semana próxima ou a seguinte. O obxectivo é que estea operativa o 1 de xuño. A Comisión Europea confirmou o xoves que todos os países poderán solicitar este crédito debido a que a súa situación económica é fundamentalmente sólida e este venres presentou a súa proposta para suavizar as condicións da supervisión á que se sometería aos beneficiarios.

Os ministros deben tamén dar máis precisións sobre o uso que podería darse a estes fondos. A idea é aclarar que poidan cubrirse non só gastos estritamente hospitalarios, senón tamén custos indirectos vinculados, por exemplo, ás medidas de confinamento para frear a pandemia, apuntan desde o Ministerio de Economía.