A imaxe que deixa hoxe tras si o incendio da Ribeira Sacra é a da destrución. Os medios de extinción seguen traballando para controlar o lume que arrasou case 1.600 hectáreas. Os traballos céntranse en apagar pequenos focos e arrefriar a zona. 

Á primeira hora da tarde de onte a Xunta desactivou a situación de alerta 2, tras remitir o perigo para os núcleos de poboación, e tamén daba por estabilizado o incendio. Veciñas do Carballo de Lor, no concello de Quiroga, explican que viron as lapas moi preto das súas casas.

A chuvia facilitou onte os traballos de extinción, complicados nos días previos pola orografía e polas extremas condicións do vento e a calor. Esa mesma chuvia e as condicións meteorolóxicas que se dean durante esta xornada serán as que en boa medida marquen o momento en que os incendios se poidan dar por controlados e posteriormente extinguidos.

O incendio comezara ao mediodía do luns en Ribas de Sil e propagouse á Pobra do Brollón e Quiroga. O outro lume de menor dimensión, que se iniciou o domingo na parroquia de Nogueira, tamén está estabilizado. Medio Rural non dubida de que foron intencionados. Son os incendios máis importantes do que levamos de verán en Galicia.