Os locais de ocio nocturno poderán abrir as súas terrazas antes do 1 de xullo, data en que está previsto que a Xunta levante a prohibición e permita o uso do interior de discotecas e salas, onde será obrigatorio o uso de máscara.

Así o acordaron na reunión mantida este xoves entre o vicepresidente da Xunta, Alfonso Rueda, e representantes do sector, entre os que figuraron o presidente da Asociación Galicia de Noite, Luis Diz, e o presidente de Fesdiga, Samuel Pousada.   

Ambas as partes coinciden en que o obxectivo é lograr "consensos" para a reactivación do sector despois de tres meses pechados e que, cando se produza a reapertura (que a Xunta atrasou ao 1 de xullo esta semana), esta se dea "coas máximas condicións de seguridade, garantindo que acudir a calquera local de lecer en Galicia sexa absolutamente seguro".

Así o indicou ao termo do encontro o vicepresidente autonómico, que agradeceu a comprensión dos empresarios coa decisión de aprazar a reapertura dos locais. Tamén agradeceu a actitude da Xunta o presidente de Galicia de Noite, que manifestou a súa satisfacción por atopar unha administración que "comprende" a "delicada" situación dos negocios e que está "disposta a dialogar" para atopar unha solución.   

As partes convocáronse para volver reunirse a próxima semana para avanzar na forma en que volverán salas e discotecas.

A ocupación máxima que se permitirá unha vez se decrete a reapertura é o foco principal de discusión. Os empresarios, segundo concretou Diz, solicitan que, de entrada, se permitan dous terzos de ocupación máxima ata o 15 de xullo, data en que propoñen ir incrementado do 75% ao 100% progresivamente e en función da evolución da epidemia, unha proposición que está afastada da postura da Xunta.   

Luis Diz, xerente da sala Pelícano da Coruña, considera preciso contar cunha "ocupación suficientemente ampla para que os negocios sexan rendibles", aínda que subliña que o primordial é garantir a seguridade dos clientes e que estes poidan acudir con confianza aos locais.

"Non podemos entrar na dinámica de prescindir do lecer, hai que espertalo", sinalou Diz, que alerta da proliferación nas últimas semanas de "macrobotellóns" e "festas ilegais en casas" onde hai menos "control" sobre o cumprimento das medidas impostas polas autoridades para combater a pandemia.   

Neste punto, incidiu en que "a arteria principal" coa que traballan sector e Xunta é a guía para o protocolo de seguridade validado polo Ministerio de Industria, Comercio e Turismo para o lecer nocturno, que inclúe a obrigatoriedade de usar máscara dado que, como recoñece Diz, "é imposible" gardar a distancia de seguridade neste tipo de establecementos.   

Así as cousas, tras a "toma de contacto" deste xoves, móstrase optimista con vistas ao encontro da próxima semana coa Xunta, aínda pendente de fixar data definitiva. Nela, o sector confía en abordar tamén a posta en marcha de axudas autonómicas aos negocios, dos que tamén depende, como lembrou, parte do sector cultural, con bandas e grupos "parados desde hai tres meses".