Os primeiros ministros de Hungría e Polonia, Viktor Orbán e Mateusz Morawiecki, respectivamente, defenderon este xoves o seu veto ao orzamento comunitario e ao fondo de recuperación ante o resto de líderes, sen obter resposta sobre esta cuestión do resto de xefes de Estado e de Goberno.

O debate sobre o punto morto no que se atopa o fondo europeo pola negativa de Budapest e Varsovia a ratificalo durou apenas un cuarto de hora e só houbo cinco intervencións, segundo informaron fontes comunitarias. En primeiro lugar tomou a palabra o presidente do Consello Europeo, Charles Michel, e despois a chanceler alemá, Angela Merkel, que resumiu a situación en calidade de presidenta de quenda da UE.

Tras estas dúas intervencións abriuse o debate entre os líderes e unicamente tomaron a palabra Orbán e Morawiecki para defender a súa postura. Despois deles interveu o primeiro ministro de Eslovenia, Janez Jansa, quen recentemente mostrou o seu apoio a Hungría e Polonia neste asunto. Ningún xefe de Estado ou de Goberno quixo pronunciarse despois, polo que este punto da reunión deuse por finalizado e pasaron a abordar a xestión da segunda onda da pandemia de coronavirus.

Non está previsto que os líderes retomen o debate sobre o paquete orzamentario. Segundo explicaron as mesmas fontes, foi Michel quen contactou con todas as delegacións antes da videoconferencia para asegurar que o debate estivese "baixo control". O presidente do Consello europeo considera que unha reunión virtual non é o formato adecuado para abordar un tema "tan complicado".

O equipo do exprimeiro ministro belga, con todo, precisou que esta decisión non supón "infravalorar" a gravidade da situación e subliñan que o orzamento e o fondo de recuperación deben ser ratificados "canto antes", pero antes é necesario un "acordo". Polonia e Hungría néganse a ratificar o Marco Financeiro Plurianual (MFP) para o período 2021-2027 e o fondo de recuperación polo novo mecanismo que vincula o desembolso dos fondos europeos ao respecto ao Estado de dereito.

Estes dous estados membros consideran que se trata dun sistema que viola os tratados comunitarios e ademais está pensado especificamente para eles. Sen o visto e prace unánime de todos os estados membros, nin o orzamento da UE nin o plan anticrise poden saír adiante, o que pon en perigo non só as contas europeas, senón tamén o fondo de 750.000 millóns de euros deseñado para relanzar as economías máis golpeadas pola crise.