Os líderes da Unión Europea decidirán este xoves nun cumio en Bruxelas se dan luz verde ao acordo ao que chegaron Hungría e Polonia coa presidencia de quenda alemá do Consello da UE para levantar a súa veto ao plan de recuperación pospandemia e ao orzamento comunitario 2021-2027.

Hungría e Polonia bloquearon hai tres semanas o pacto sobre o paquete de recuperación, que mobilizará en total 1,8 billóns de euros, polo seu rexeitamento ao mecanismo que condicionará este diñeiro a que se respecte o Estado de dereito.

A solución negociada entre Budapest, Varsovia e Berlín non modifica esta regulación, que foi aprobada por unha maioría cualificada de países, pero engade unha declaración que clarifica como se implementará e o papel que desempeñará a xustiza europea na súa validación. O compromiso recolle que, no caso de que Hungría ou Polonia recorran a norma ante o Tribunal de Xustiza da Unión Europea, a Comisión non poderá suspender fondos nin propoñer medidas baixo este mecanismo ata que a corte se pronuncie, algo que podería levar un ano ou máis.

Os servizos legais do Consello, involucrados na redacción deste compromiso, presentaron hoxe aos embaixadores dos vinte e sete países comunitarios o contido do documento e agora as delegacións nacionais esperan a avaliación dos expertos xurídicos dos seus gobernos. A decisión recaerá mañá sobre os xefes de Estado e de Goberno na que debería ser o seu último cumio de 2020 e, de haber acordo, non podería concluírse ata o venres, segundo unha fonte diplomática.

Mentres que unha fonte diplomática indicou que a resposta dos embaixadores foi "maioritariamente positiva", outra delegación mostrouse máis cauta e apuntou que "todo o mundo necesita enviar (o texto) as súas capitais e confirmar" o seu consentimento, aínda que valorou o "traballo incansable" da presidencia alemá para "cociñar" este compromiso.